Mac OS X: Cló Gaelach

Dáiltear Mac OS X in éineacht le méarchlár darb ainm 'Irish Extended' lenar féidir an cló Gaelach a scríobh. Ach más féidir na gutaí fada a scríobh go héasca le 'Irish Extended' (ní gá ach option+guta a bhualadh in éineacht), tá sé níos deacra na consain shéimhithe a bhreacadh (caithfear option+w a bhualadh roimh an gconsan atá le séimhiú), agus níl aon bhealach éasca ann chun 'r' ard ná 's' ard a scríobh.

Dá bhrí sin, is oiriúnaí an méarchlár atá le fáil anseo. Oibríonn an méarchlár seo le Mac OS X 10.4 ('Tiger'), le Mac OS X 10.5 ('Leopard') agus le Mac OS X 10.6 (Snow Leopard), ach níor tástáladh é le leaganacha níos sine den chóras. Ar ndóigh, caithfidh an cló a bheith códaithe de réir Unicode.

Faigh an comhad macgael.zip (24 KB) ina bhfuil an méarchlár do Mac OS X dar teideal 'Cló Gaelach'.

Suiteáil

1. Tá an méarchlár pacáilte i gcomhad comhdhlúite a bhfuil macgael.zip air agus méadóidh Mac OS an comhad sin go huathoibríoch chun fillteán darb ainm Keyboard Layouts a chruthú (mura dtarlóidh sé sin, cliceáil air macgael.zip lena mhéadú). Laistigh den fhillteán beidh dhá chomhad - Cló Gaelach.keylayout (an méarchlár) agus Cló gaelach.icns (deilbhín d'fháinne óir).

2. Téigh chuig Computer > Macintosh HD > Library > Keyboard Layouts agus sábháil an dá chomhad (Cló Gaelach.keylayout agus Cló gaelach.icns) ó chéim a haon sa bhfillteán.

3. Téigh chuig System Preferences > International (i Leopard) nó chuig System Preferences > Language & Text (i Snow Leopard). Feicfear fuinneog cosúil leis an gceann thíos. Cuardaigh sa liosta faoin teideal Input Menu (i Leopard) nó Input Sources (i Snow Leopard) agus roghnaigh an bosca in aice le Cló Gaelach lena shuiteáil. Dún an fhuinneog.

4. Téigh ar ais go dtí an roghchlár ag barr an scáileáin agus roghnaigh Cló Gaelach mar mhéarchlár oibre - féach thíos.

Beidh tú in ann athrú idir na méarchláir go léir atá suiteáilte ar an ríomhaire (mar shampla, idir Irish Extended agus Cló Gaelach sa sampla atá léirithe thuas) de réir mar a oireann ceann nó eile de na méarchláir duit.

Úsáid an mhéarchláir

Chun carachtar a scríobh le 'Cló Gaelach' ní gá ach luí ar an gcnaipe a bhfuil 'option' air agus cnaipe eile a bhualadh ag an am céanna. Mar shampla, chun an litir 'á' a scríobh, luigh ar 'option' agus buail 'a'. Léiríonn an tábla thíos conas a scríobhtar na carachtair éagsúla.