Suiteáil (Linux)

Is feidir comhéadan grafach (leithéidí Cinnamon, Mate, KDE, Gnome, Xfce, Unity) nó líne na
n-orduithe a úsáid chun clónna a shuiteáil in Linux.

Comhéadan grafach

Scaiptear Font Viewer le beagnach gach dáileadh de Linux anois: mura bhfuil sé agat cheana, mholfainn duit é a fháil gan mhoill. Cliceáil faoi dhó ar dheilbhín an chló atá le suiteáil le cnaipe clé na luiche agus taispeánfar é sa Font Viewer má tá sé ar do ríomhaire, rud a thabharfaidh deis duit an cló a scrúdú. Más mian leat é a suiteáil ansin, buail an cnaipe a bhfuil 'Install' air.

Thíos: mar a léirítear Bunchló sa Font Viewer ar Linux Mint 17 leis gcomhéadan grafach 'Cinnamon'.

Thíos: mar a léirítear Dlúthchló sa Font Viewer ar Kubuntu 14 leis an gcomhéadan grafach 'KDE'.

Ach má theipeann ar an modh thuas (nó más Linuxóir go smior thú) is féidir líne na n-orduithe a úsáid chun cló a shuiteáil chomh maith.

Líne na nOrduithe

Is iomaí dáiliúchán de Linux atá ann agus ní mar an gcéanna a chaitheann siad le clónna. Chun a fháil amach cá bhfuil na clónna suite ar do ríomhaire féin, cuir an t-ordú seo a leanas isteach i líne na n-orduithe:
locate .ttf
Taispeánfaidh an t-ordú seo duit cá bhfuil na clónna TrueType ar do ríomhaire. Moltar duit clónna nua a choinneáil i gcomhadlann a bhfuil mórchuid clónna inti cheana.

Seo mar atá cúrsaí in Ubuntu, ceann de na dáiliúcháin is coitianta de Linux:
1. Más mian leat go mbeidh an cló nua le fáil ag gach duine a úsáideann an ríomhaire, sábháil é in:
/usr/share/fonts
nó in
/usr/local/share/fonts
2. Ach más fearr leat nach mbeidh an cló le fáil ach ag úsáideoir áirithe, cuir i dtaisce é in:
/home/username/.fonts/
nuair is é 'username' ainm an úsáideora atá i gceist.

Is fiú an t-ordú seo a leanas a rith ó líne na n-orduithe ag an deireadh:
sudo fc-cache -f -v
Cinnteoidh an t-ordú seo go mbeidh an cló nua le fáil agat i ngach ríomhchlár.